夏天點都要去下camp先得既, 一早聽聞香港終於有車camp呢樣玩意, 但好難book! 我地都係托朋友幫手仲要一個月前book定先有位. 你話佢幾咁多人想試玩! 我一直都只聽身邊既朋友講呢到係點樣點樣, 今次終於可以親身試玩.
我地一行5人由中環坐船去梅窩, 落船仲要搭的士才先到去露營車既地點. 一落車, 陣陣既牛屎味就撲埋黎! 立即覺得好有歐瑞強既郊嘢feel! ! 之後沿住一條石磚路行, 周圍都有幾隻牛訓係草地到曬太陽. 超寫意! 原本前一日仲落緊雨, 幾驚今日都會落雨.但天公做美, 非常好天. 我地約咗2點半check in. 準時到達!
有個帶草帽既阿叔迎接我地. 帶我地穿過一段短石磚路行入營地.
營地門口係木欄做成, 都幾有農場feel
登登登登! 呢間就係我地架車, 原本我地book咗6人車, 但最終竟然變咗4人車, 有少少失望. 我地一行5人, 有3個人要逼埋同一張雙人床訓, 訓得有少少唔舒服. 係此趟旅程的敗北.
呢位就係黎迎接我地既農場阿叔, 佢好細心咁介紹車內的設備, 務求教識曬我地為止. 係好好既人, 不過佢唔係營地主人, 但我地都以為佢係, 哈哈!
車內有一張雙人床及兩張沙發床, 可打開成為兩張床, 兩個人訓就剛剛好, 3個人訓就要頭搭尾. 幾迫的!
地方細細但設備齊全既廚房, 杯杯碟碟都有齊,係爭個電飯煲, 因為我地打算夜晚打邊爐, 好彩農場叔叔係第二到班到個電飯煲比我地. 佢聽到我地話打邊爐都覺得奇怪. 因為一般黎親既都係係車出面個私人燒烤爐燒烤. 個晚其實唔太熱, 坐係出面都好舒服.
呢張就係我訓既雙人床, 訓出面個個會有少少吊腳. ^^
車內同車外係兩個世界, 車內冷氣充足, 一入黎即刻嘆返罐可樂先啦! 仲搵到達人兩個字添.
其實營地附近除咗燒嘢食同有一個沙灘之外, 就無咩其他嘢玩, 沙灘離營地幾分鐘路程, 好近! 我地等到無咁曬就落沙灘玩, 呢到都有少量蜆摸, 都好大隻, 不過朋友剩係掘到幾隻. ^^ 都係落水玩好過!
呢到一到黃昏就好靚, 旁邊架車仲有小朋友吹波波, 成個景色都好正!
營地到咗夜晚會着燈,同朋友坐係出面傾下飲下嘢都幾好FEEL!
打邊爐玩Killer之夜
早上聽到既唔係雀仔叫, 而係牛叫-_-, 走出車外見到周圍既山都比濃霧圍住, 有種隔世既感覺!
